Stor spenning
Det var knytt stor spenning til årets landsmøte i Den indre Sjømannsmisjon. Kampen ville stå om Betelskipet «Elieser 6». 90 var påmelde, av desse var 63 utsendingar med stemmerett.
Tekst og foto: Ingrid Helland
Dei 10 siste åra har Den indre Sjømannsmisjon levd på pengane etter salet av Oslo Sjømannskirke. Utgiftene har vore større enn inntektene, og no er misjonen i ein situasjon der det snart ikkje er pengar igjen.
Fleire avdelingar går med underskot - eller med eit lite overskot som ikkje er stort nok til å dekka det samla underskotet.
Stor kostnad
Under landsmøtet (på forhandlingsmøtet) understreka landsstyreleiar Pål Vigmostad at organisajonen er i ein alvorleg situasjon pga. for mange misjonsprosjekt i forhold til bæreevne. Han nevnte Elieser som eksempel.
- Eitt møte på Elieser har ein kostnad på 25.000 kroner. Då medrekna lønn, drivstoff, kaileige, straumutgifter, annonse og administrasjon.
BEKYMRING: Vil Den indre Sjømannsmisjon snu ryggen til Betelskipet “Elieser 6”?
Flaggskipet
«Elieser 6» er DISM sitt flaggskip. Det første skipet vart kjøpt inn i 1903. Med Elieser-båtane har misjonen nådd ut til fiskarar og til folket langs kysten på ein unik måte. Mange har møtt Jesus gjennom dette reiskapet. Derfor var det ekstra sårt og vanskeleg når nettopp Elieser skulle vera «trumfkortet» på landsmøtet i 2024. Har misjonen råd til å driva vidare med «Elieser 6», eller skal skipet selgjast?
Fleire hadde ordet under forhandlingsmøtet, mange med gode kjensler og minne etter opplevingar med Elieser. Å kvitta seg med Betelskipet er det same som å slå beina under Den indre Sjømannsmisjon.
Andre meinte at misjonen ikkje ville klara vidare drift av båten. Kjenslene må ikkje få styra situasjonen, vart det sagt. Det vart oppfordra om å halda fram misjonsarbeidet utan Elieser.
PAUSE: Godt å få lufta tankane med andre.
Fem forslag
Etter lengre samtale og diskusjon om betelskipet «Elieser 6», gjekk landsmøtet til avstemming over fem ulike forslag. 60 med stemmerett var til stades under avstemminga.
Forslag A. Frå Elieserkomiteen:
«Driften med Elieser fortsetter, men med overgang til ett skift og en person om bord (maskinist) når skipet ikke seiler.»
Forslag B. Frå Elieserkomiteen:
«Driften med Elieser fortsetter, men med to fulle skift.»
Forslag C. Frå landsstyret:
«Elieser kan drives videre, men med maksimalt 1 million kroner i underskudd per år. Hvis dette overskrides, skal landsstyret selge skipet.»
Forslag D. Benkeforslag fra misjonssekretærene André Sætre, Andreas Bjerre Nielsen, Arve M. Abelsen og kretsstyremedlem Tone Kallevåg:
«Betelskipet (Elieser 6) skal selges for kroner 1 snarest mulig til en evangelisk sammenheng som vil drive båten. Hvis ingen evangeliske sammenhenger er interessert i å overta båten og drive den, skal den bli solgt for markedspris.»
Forslag E. Benkeforslag frå misjonssekretær Svein Helge Torsteinsbø og Ingolf Solsvik:
«Elieser drives videre, men med maksimalt 1 million kroner i underskudd per år. Hvis dette overskrides, skal det kalles inn til ekstraordinært landsmøte for å drøfte videre drift.»
Det vart stemt til eitt av forslaga hadde over 50% tilslutning. Forslaget med færrast stemmer vart tatt vekk for kvar ny runde.
Til slutt stod det igjen to forslag: Forslag E og D. Med knapp margin fekk forslag E flest stemmer.; 32 mot 28.
Vidare drift - korleis
Dermed skal Den indre Sjømannsmisjon driva betelskipet «Elieser 6» vidare.
I etterkant av landsmøtet blir det no jobba med korleis, for det spørsmålet er åpent etter landsmøtet 2024.
Det vi veit, er at det skal vera ein 14 dagars møteaksjon om bord på Ferkingstad frå 8.-18. august. Så skal båten til Flekkerøy – der Bedehuskanalen skal ha sendingar om bord.
Be for og om
Ver med og be for drifta av betelskipet. Be om Guds leiing. Be om at pengar må koma inn til drifta, så underskotet ikkje blir for stort, og be om at nye må få møta Jesus gjennom alt arbeidet til Den indre Sjømannsmisjon.
For det er landsmøtet einige om: Dei vil misjon!
ORDSTYRARANE: Landsstyreleiar Pål Vigmostad takkar Olaug Vikingstad og Nils Håkon Urangsæter for god leiing av forhandlingsmøtet.